黑盒

近日因為一部籌備中的電影離港往國內「睇景」。
「睇景團」的行程包括浙江省橫店影城內的各個景點、新昌及象山等……
早機去、晚機返，住了三間不同「星級」的酒店，食足咁多餐，足足七天……
屋企人及若干MSN上的朋友都唔明白點解要去咁多日。
「睇景之嘛，又唔係拍……」
「睇景」有乜好睇？要睇啲乜？點樣睇？
為免逐一回答，小弟決定唔怕醜，以疏淺的經驗寫下「Unofficial Guide To電影製作-----睇景」。

注意：本文主旨乃係嚇唬一般百姓或對電影充滿熱誠而打算投身「火海」的有志青年，如有電影從業人員不幸閱畢此文，感到胡吹亂謅、瞎掰胡扯，完全不能反映事實，實屬正常反應，敬請一笑置之……阿們。

Unofficial Guide To電影製作-----睇景之一(本地篇)

選景(Location scouting) 名詞(n.)：尋找或物色拍攝場地

一) 搵景：

電影開拍前，製片部的手足都會找出電影中將出現的場景準備拍攝。
他們可以從以下各項找到蛛絲馬跡，推測影片對場景的要求：
1) 劇本
2) 分場
3) 故事大綱
4) 片名
5) 類型(即係愛情片定警匪片……)
6) 乜都冇
(如遇上第4、5、6項的情況，製片部將發揮其驚人的想像力完成任務，例如：警匪片的話，梗有個貨艙……)

二) 睇景

導演從製片組手足拍攝的「候選場地」照片中篩選需要親身視察的場景。
(備註：以下圖片乃係小弟在最近有份參與的兩部影片中拍攝下來的)
圖中一干人等正在進行的活動便是「睇景」！
從左到右分別是美術組、機器組、導演、導演組和製片組……
如果場地將發生爆炸、飛車、跳樓等「動作場面」，動作組也會同行。

每個組別對場地的「切入點」各有不同，各有各的關心和考慮。
「睇景」時，同一個地方，但每個人的內心都泛起不同的V.O.(心聲)。

例子一：
製片：(V.O.)「幾多錢？貨車入唔入得？有冇電？有冇水？廁所遠唔遠？」

例子二：
如果場地是用來拍攝大場面的話……
副導演：(V.O.)「要Book幾多個臨時演員先塞得滿個景？」

一般嚟講，冇一個景可以全完符合情節所需，所以美術組一定會喺個景「做手腳」、加工、修葺……
美術組手足最常問的一個問題是：「使唔使還原？」
「還原」即係為劇情要求而喺場地裝裝拆拆、大變身之後，拍攝完畢使唔使「打回原形」，回復原狀。
小弟曾經遇過一個相當有趣的場面。

例子三：
話說某美術組手足走進場地後，左望右望，東指西指……
「呢個拆咗去啦！」
「嗰個拆咗去啦！」
「呢度拆埋去啦！」
……
我看見業主的臉色一陣灰一陣紅，又怕又嬲……

作為編劇，「睇景」時，小弟的V.O.又是甚麼？心情又是怎樣呢？
我十分享受「睇景」。
在製片組的安排之下，一大班人乘著車，由早到晚，在不同的場景跑來跑去，而且，所到之處大多是平日不會去的，感覺就像小學生去旅行。
「睇景」是劇本的文字化作真實的第一個階段，看著腦海中的場景逐步「影像化」，這種感覺極棒！
場景需要配合劇情而修飾，同時，處身現實，被天地觸動，與萬物互動，情節也會因為環境而變化。
「睇景」也是創作的一個部份。

在香港「睇景」對我來說是學校小旅行，出發往外地「睇景」便是「從香港出發」的旅行精華遊！
「海外睇景旅遊團」有乜好睇？要睇啲乜？點樣睇？
一大班人像童軍「宿營」般一齊起居飲食，「睇景」之餘剩番嘅時間點打發？
下回再談。